भारत हा एक कृषीप्रधान देश आहे. गावात शेती हा प्रमुख व्यवसाय आहे व त्या सोबतच शेती आधारित उद्योगही केले जातात. आज ग्रामीण जीवन झपाट्याने बदलत आहे व गाव आता हळू हळू शहरीकरणासाठी सज्ज होत आहेत. एकीकडे गावात गावपण हरवत आहे तर दुसरीकडे सामान्य जनता विशेषत: शहरातील लोक ग्रामीण जीवनशैलीबाबत अनभिज्ञ आहेत. आजच्या पिढीला तसेच येणाऱ्या सर्व पिढ्यांना गाव व त्या मधली कृषी आधारित जीवनशैली समजावी तसेच अगदी जवळून अनुभवता यावी यासाठी कृषी पर्यटनातून ग्रामविकास हा मंत्र मनाशी बाळगून श्री नंदकुमार काटकर यांनी आपल्या अथक प्रयत्नातून पर्वत रांगा आणि हिरवळीने नटलेल्या कराड मधील बेलदरे ह्या गावी ४ एकर परिसरात ‘आपलं गाव’ हे कृषी पर्यटन केंद्र साकारले आहे. कृषी पर्यटनामधील एक आदर्श उदाहरण असलेल "आपलं गाव" फक्त तुम्हाला तुमच्या मातीशीच नाही जोडत तर तुमच्या पूर्वजांच्या सुंदर आठवणींनाचा खजिनाच मिळवून देते.